ВАКЦИНИТЕ СЕ ДОВОЛНО ЕФЕКТИВНИ И НЕМА ПОТРЕБА ОД ТРЕТА ДОЗА, СЕ ВЕЛИ ВО НОВ НАУЧЕН ИЗВЕШТАЈ

    ВАКЦИНИТЕ СЕ ДОВОЛНО ЕФЕКТИВНИ И НЕМА ПОТРЕБА ОД ТРЕТА ДОЗА, СЕ ВЕЛИ ВО НОВ НАУЧЕН ИЗВЕШТАЈНекои држави веќе почнаа да ја даваат третата доза поради загриженоста од делта сојот (Фото: СДК.МК)

    Вакцините се доволно ефективни за да спречат сериозно разболување од ковид-19 и моментално нема потреба да се дава трета доза на пошироката популација, се вели во студијата објавена во медицинското списание „Лансет“.

    Некои држави веќе почнаа да ја даваат третата доза поради загриженоста од попреносливиот делта сој, при што Светската здравствена организација повика да се воведе мораториум на тоа, сметајќи дека така ќе се наруши доставата на вакцини во сиромашните земји, каде што милиони луѓе сè уште ја немаат примено ни првата доза.

    Новиот извештај на научниците заклучува дека и покрај заканата од делта сојот, дополнителното вакцинирање на општата популација не е соодветно во оваа фаза од пандемијата. Тие велат дека вакцините остануваат високо ефективни против сериозните симптоми на ковид-19, што се однесува на сите главни варијанти на вирусот, иако тие имаат помал успех во спречувањето на асимптоматските случаи на зараза.

    „Кога сè ќе се земе предвид, моментално достапните студии не даваат веродостојни докази за значително намалување на заштитата од сериозно разболување, што е примарна цел на вакцинирањето“, изјави водечката авторка на извештајот, Ана-Марија Хенао-Рестрепо од СЗО.

    Таа додаде дека приоритет треба да бидат луѓето кои сè уште чекаат да бидат вакцинирани со првата доза.

    Франција почна да ја дава третата доза на стари лица и на оние со нарушен имунитет, додека Израел отиде уште подалеку и ја нуди на сите над 12 години.

    Во извештајот објавен во „Лансет“ се заклучува дека сегашните варијанти на коронавирусот не се развиле доволно за да го избегнат имунолошкиот одговор што го создаваат постојните вакцини.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира