Вакцинацијата против ковид-19 ќе биде задолжителна во Грција за здравствените работници и персоналот во старечките домови, откако пак почна да расте бројката на нови случаи во земјата, кажа денеска премиерот Кирјакос Мицотакис.

Оваа мерка стапува во сила веднаш за персоналот во старечките домови, додека за здравствените работници ќе почне да важи од 1 септември.

Мицотакис исто така соопшти нови рестрикции за спречување на ширењето на коронавирусот, па така влез во затворени кафулиња, ресторани, кина, театри и други затворени простори ќе биде дозволен само за вакцинирани муштерии.

Грчките власти ќе се обидат и да ги вакцинираат сите припадници на армијата со тоа што ќе се спроведува вакцинација по касарните, рече Мицотакис.

Грција регистрираше 2.065 нови случаи на ковид-19, како и 10 починати во изминатите 24 часа.