Италија го пријави најмалиот број на починати од КОВИД-19 од 19 март, откако во последните 24 часа оваа болест однесла 552 животи. Тоа е нов знак за подобрување на ситуацијата во земјата откако вчера бројката изнесуваше 681.

Од коронавирусот досега починаа 15.887 жители на Италија.

Шефот на цивилната заштита Анџело Борели извести дека има и 4.316 нови случаи на зараза, што е околу 500 помалку во однос на вчера.

Бројот на мртви продолжи да паѓа и во Шпанија. Таму во последните 24 часа починале 674 луѓе од КОВИД-19, дури 135 помалку во споредба со вчера. Шпанија е сега на 12.418 починати од последиците на коронавирусот, како и на 130.759 заразени, од кои 6.023 се новорегистрирани случаи.

„Овој петпроцентен пораст е најмал од почетокот на кризата“, објави шпанското министерство за здравство, кое вчера најави дека земјата полека го надминува врвот на заразата.

Шпанија вчера ја надмина Италија во бројот на заразени.