Германската канцеларка Ангела Меркел е подготвена по четврти пат да формира влада, откако Социјалдемократите гласаа за приклучување кон големата коалција, со што ќе се стави крај на петмесечната политичка криза во земјата.
Членството на партијата беше поделено по ова прашање, при што водството ја поддржуваше коалицијата, додека нејзиното радикално младо крило беше против. На внатрепартиското гласање, кое се одолжи до доцна во ноќта, 66% од членовите се изјаснија „за“.
Меркел, која е на власт веќе 12 години, сега ќе има силна опозиција во крајнодесничарската партија Алијанса за Германија, која освои голем број гласови на изборите и за првпат влезе во парламентот благодарение на својата антиимиграциска политика.
Истовремено, Социјалдемократите го остварија најлошиот резултат на едни избори во својата историја, но, сепак, остануваат на власт, откако Меркел претходно не успеа да се договори со либералните Слободни демократи и со Зелените.
