Министерот за здравство Венко Филипче смета дека некаква рестрикција во однос на затворање на граници и карантин за патници кои доаѓаат од одредени земји нема да даде ефект во заштитата од новиот сој на ковид-19. Омикрон за првпат беше детектиран на 24 ноември во Јужна Африка.

Израел и Јапонија забранија влез за сите странци, а Велика Британија, Холандија, Канада, САД, ЕУ ги прекинаа авионските врски со државите од југот на Африка.

„Очигледно е дека е детектиран во некои европски земји, досега видовме дека кога ќе се појави нов сој не може да се спречи да се појави на друга територија. Ќе се појавуваат и други соеви.  Сѐ уште нема доволно познати информации, иако, Светската здравствена организација (СЗО) укажува на тоа дека е полесно пренослив. Сепак директорот на Американскиот институт за здравство смета дека и за тоа нема доволно информации, и дека се тука некаде по степенот на преносливост со делта сојот“, рече Филипче по утринскиот состанок на Комисијата за заразни болести.

Заклучокот од состанокот е дека состојбата со ковид-19 во земјава е стабилна, неделната инциденца е за 5 проценти помала во однос на претходната недела, а тоа се чувствува, вели Филипче, и по состојбата со слободни места во болниците. Актуелните мерки, вели министерот, се така димензионирани да, се штити и нашата земја, како и околните.

На утрешната владина седница ќе се разговара за новиот предлог на Комисијата, матичниот лекар да биде награден со 30 денари по пациент од вкупниот број пациенти запишани кај него, откако ќе надмине 70 отсто на вакцинација од вкупниот број пациенти.

Владата на седницата на 25 ноември не донесе одлука за предлогот на Комисијата за заразни болести за задолжителна вакцинација на здравствените работници и препорака за имунизација на јавниот и приватниот сектор и побара од Комисијата дополнителни анализи и компаративни студии за предложените мерки, но и предлози за дополнителни мерки за поттик за масовна вакцинација.

На новинарски прашања за здравствената состојба на седумте преживеани од автобуската несреќа на 23 ноемви во Бугарија, Филипче кажа дека двајца патници кои досега беа на Клиниката за пластична хирургија во Скопје денеска ќе бидат пуштени на домашно лекување, а тројца се очекуваат да пристигнат од Софија до вечерва. Останатите двајца во наредниот период ќе се вратат од Бугарија.

Во однос на тоа дали ќе се кандидира за нов претседател на СДСМ, Филипче кусо одговори дека нема.

Б. НЕСТОРОСКА