По три силни брана, вирусот ковид-19 конечно стивнува и сега вакцината е најсилното оружје во таа борба, апелира министерот за здравство Венко Филипче, повикувајќи ги граѓаните во што поголем број да се пријават на сајтот www.vakcinacija.mk. Тој ги повикува сите и да ги убедат своите блиски, пријателите и сограѓаните да се пријават за имунизација.
„Само со масовна вакцинација на што поголем број граѓани ние ќе спасиме човечки животи и ќе ставиме крај на пандемијата и ќе го вратиме животот онаков каков што го знаеме“, вели министерот во видеообраќањето до граѓаните.
Според последните податоци од сајтот, во земјава се вакцинирани 216.013 граѓани, а пријавени се 390.330 граѓани.
Имунизацијата во земјава се одвива со вакцината на „Фајзер“, „АстраЗенека“ и со „Синофарм“.
Филипче на 19 мај најави дека на почетокот на јуни треба да стигнат 500 илјади вакцини од кинеската „Синовак“, а во текот на јуни 100.000 на „Фајзер“ вакцини преку Ковакс механизмот. Според него, има најави од претставници на Руската амбасада оти до крај на мај треба да стигне одредена количина на „спутник“, но додава дека не се потврдени.
Б. НЕСТОРОСКА
