Црвениот крст на Велес од денеска започнува со бесплатни здравствени прегледи кои ќе се одвиваат во домовите на велешани. Активноста се реализира партнерски со Општина Велес и ЈЗУ „Здравствен дом“ од Велес.

„Целта е да се избегне посета на амбулантите каде има поголем број луѓе, а со тоа и големи шанси за ширење на коронавирусот. Ќе се вршат кардиолошки прегледи, мерење на шеќер во крвта и психолошка поддршка“, велат од Црвен крст на Велес.

Прегледите се изведуваат во домовите на граѓаните, откако претходно тие телефонски ќе се пријават. Кардиоваскуларните прегледи и мерење на шеќер во крвта ќе ги извршува специјалист кардиолот, волонтер во Црвен крст. Тој ќе врши ЕКГ и мерење на шеќер во крвта на оние граѓани кои имаат потреба од редовна контрола, еднаш во неделата или во месецот.

П. ПЕЧКОВ