САД и Русија соопштија дека постигнале договор за Сирија, кој предвидува примирје низ целата земја, почнувајќи од следниот понеделник, а една недела подоцна ќе следува ново неочекувано воено партнерство помеѓу двете ривалски влади во борба против Исламска држава и ал-Каеда. Американскиот државен секретар Џон Кери нешто по полноќ кажа дека планот може да го намали насилството во Сирија и да доведе до долгоочекуваната политичка транзиција, ставајќи крај на повеќе од пет години крвопролевање. Тој го нарече договорот потенцијална „пресвртна точка“ во конфликтот во кој загинаа над 500.000 луѓе, под услов да биде исполнет од сириската влада, поддржана од Русија и од бунтовничките групи, поддржани од САД.

Примирјето почнува да важи од вечерта на 12 септември, што се поклопува со муслиманскиот празник Еид ал-Адха. Партнерот на Кери во преговорите, рускиот министер за надворешни работи Сергеј Лавров, го потврди договорот и кажа дека тој ќе помогне да се прошири борбата против терористите и дистрибуцијата на помош до сириските цивили. Тој кажа дека сирискиот претседател Башар Асад е подготвен да го исполни договорот.