Претседателот на САД Доналд Трамп и првата дама Меланија Трамп се позитивни на коронавирусот, објави тој денеска на Твитер. Позитивниот тест доаѓа на еден месец до изборите и откако претседателот ја помина годината во голема мера минимизирајќи ја заканата од вирусот.

Позитивниот тест на Трамп доаѓа само неколку часа откако Белата куќа објави дека една од неговите најблиски соработнички Хоуп Хикс се разболела од ковид-19 откако патувала со претседателот неколку пати оваа недела. Трамп последен пат го видоа новинарите како се враќа во Белата куќа во четвртокот вечерта и изгледаше дека е во добра здравствена состојба. Трамп има 74 години, што го става на поголем ризик од сериозни компликации од вирусот кој сега уби повеќе од 205. 000 луѓе во САД.

„Вечерва, првата дама и јас сме регистрирани позитивни на Ковид-19. Веднаш ќе го започнеме карантинот и процесот на опоравување. Ќе го поминеме ова ЗАЕДНО!“, твитна Трамп.

Во меморандум, лекарот на претседателот рече дека тој и првата дама „се добро во овој момент“ и „планираат да останат дома во Белата куќа за време на нивното опоравување“.

„Бидете сигурни дека очекувам претседателот да продолжи да ги извршува своите должности без нарушувања додека се опоравува“, додаде тој.

Дијагнозата претставува голем удар за претседателот кој очајно се обидуваше да ја убеди американската јавност дека најлошата пандемија е зад нив, дури и кога случаите продолжуваат да растат само неколку недели пред изборите на 3 ноември. И стои како најсериозна закана за јавното здравство со која досега се соочил американски претседател во својот мандат.