Бугарската влада донесе одлука да ги проучи можностите да осигура вакцини против ковид-19 за граѓаните на Северна Македонија, соопштија денеска од бугарската влада. Оттаму велат дека тоа ќе биде можно откако ќе се обезбедат бугарските потреби со запазување на процедурите и условите од прелиминарните договори, склучени меѓу Европската комисија и производителите на вакцините.

„Кога ќе можеме и по склучувањето на меѓународните договори, ќе вложиме сили за соработка и координација во борбата со ковид-19, вклучувајќи и испитување на можностите за обезбедување на вакцини против ковид-19 за граѓаните на Северна Македонија“, се вели во соопштението на бугарската влада.

Македонскиот министер за здравство Венко Филипче денеска престојува во Софија на покана на бугарската влада и по владината седница тој потпиша писмо за намери меѓу министерствата за здравство на Бугарија и Северна Македонија со бугарскиот колега Костадин Ангелов.

Според потпишаното, двете земји се согласиле дека во сложената во моментов епидемиолошка состојба, предизвикана од ковид-19, заштитата на здравјето на луѓето е од првостепена важност  за секоја држава.

Филипче утринава на својот Фејсбук профил напиша дека Република Бугарија од секоја пратка на вакцини против ковид-19, кои директно ги купиле од производителите, дел ќе донира и на нашата земја и дека бугарската влада одлучила во нашата земја вакцини против ковид-19 да стигнуваат во исто време, како и во останатите земји членки на Европската Унија.