Стотина граѓани вечерва пред Универзалната сала во Скопје се простија од српски кантавтор Ѓорѓе Балашевиќ, кој почина вчера во Нови Сад од ковид-19. Пред платото на Универзална сала каде Балашевиќ во неговата богата музичка кариера држа повеќе концерти, граѓани му одадоа почит палејќи свеќи и пеејќи ги неговите песни.

Градоначалникот на Скопје Петре Шилегов вчера на својот фејсбук профил напиша дека со Балашевиќ договарале при повторното отворање на Универзална да настапи токму тој.

Балашевиќ почина на 67 години поради компликации од ковид-19. (Фото: К. Попов)

Синоќа и денеска во повеќе градови низ целата бивша Југославија се одвиваат слични собири на кои му се оддава почит на Балашевиќ, а во Србија денот на неговиот погреб ќе биде прогласен за ден на жалост.

Познат по прекарот Панонски морнар, по неговата популарна песна, Балашевиќ кариерата ја почна со групата „Жетва“ и хитот „Во патецот те бакнувам (У раздељак те љубим), продолжи со „Рани мраз“, а 1982 почна соло кариера и стана еден од најпопуларните кантавтори во бивша Југославија. Автор е на 12 студиски албуми и два снимени во живо. Меѓу хитовите се и „Моја прва љубов“ (Моја прва љубав), „Сметајте на нас“ („Рачунајте на нас“), „Прости ми Катрин“ (Опрости ми Катрин), „Приказна за Васа Ладачки“ (Прича о Васи Ладачком), „Животот е море” (Живот је море).

Уште во 1987 година со песната „Само да нема војна“ (Само да рата не буде) најави како ќе се позиционира во претстојните трагични случувања во земјата и за време на војната падна во немилост на режимот на Слободан Милошевиќ поради своите антинационалистички и антивоени ставови и стихови.