Драмата „Земја на номади“ на кинеската режисерка Клое Жао е прогласена за најдобар филм на 93. Оскари, освојувајќи три големи награди на церемонија која се разликуваше од сите досегашни и се одржа два месеца подоцна од вообичаено.

Единаесет години по Кетрин Бигелоу, Жао стана само втора жена која се закити со режисерскиот оскар, а големо изненадување се случи на крајот на вечерта во главната железничка станица во Лос Анџелес кога Ентони Хопкинс беше прогласен за најдобар актер за филмот „Татко“, победувајќи го покојниот Чедвик Боузман, кој важеше за изразен фаворит. Со 83 години, Хопкинс стана најстариот актер кој освоил оскар.

Победата на „Земја на номади“ беше на големо очекувана и го круниса неверојатниот подем на Жао, за која ова е само трет филм, снимен за буџет од пет милиони долари и со кастинг од главно непрофесионални актери. Ѕвездата на филмот Френсис Мекдорманд го доби оскарот за најдобра актерка, нејзин трет, со што се израмни со Мерил Стрип. Рекордерка е Кетрин Хепберн со четири.

„Пронаоѓав добрина во луѓето секаде каде што патував низ светот. Ова е за сите кои имаат верба и храброст да држат до добрината во себеси и до добрината во другите, без разлика колку тешко било тоа“, изјави Жао.

Глен Клоуз изгуби по осми пат, овојпат од Јух Џунг-Јоун („Минари“) за најдобра споредна женска улога и тоа е првиот актерски оскар за Јужна Кореја, што доаѓа една година по големиот триумф на „Паразит“. Британецот Даниел Калуја славеше во машка конкуренција за „Исус и црниот месија“.

„Татко“ беше награден и за најдобро адаптирано сценарио, додека Емералд Фенел загуби од Жао за најдобра режисерка, но доби утешна статуетка за најдобро оригинално сценарио за „Надежна млада жена“.

Од десетте номинации, „Менк“ освои само два оскара, за кинематографија и сценографија, најдобар странски филм е „Уште една тура“ од Данска, а најдобар документарец „Октоподот, мојот учител“ од Јужна Африка.