Манчестер јунајтед го назначи Германецот Ралф Рангник за привремен тренер до крајот на сезоната. Тој доаѓа на местото на Оле Гунар Солшер, кој доби отказ на 21 ноември.

Шеесет и тригодишниот Рангник досега имаше административна функција во Локомотив Москва.

„Возбуден сум што доаѓам во Манчестер и посветено ќе работам оваа сезона да ја направам успешна“, изјави тој.

Доколку добие работна виза на време, Рангник би требало да дебитира на 2 декември против Арсенал.

Рангник изгради завидна тренерска репутација во Германија, каде што ги водеше Улм, Штутгарт, Хановер, Хофенхајм, РБ Лајпциг и Шалке, со кого стигна до полуфиналето на Лигата на шампионите во 2011.