Украинскиот претседател Володимир Зеленски ја повика меѓународната заедница да реагира повеќе за да се запре руската инвазија, велејќи дека санкциите не се доволни. Тој кажа дека Украина е оставена да се бори сама против Русија, чии сили се доближуваат кон главниот град Киев.

Градот утрово бил ракетиран и украинските власти велат дека очекуваат тенковски напади во текот на денот, за кој сметаат дека би можел да биде најтежок во оваа војна. Од министерството за одбрана се согласуваат дека руските трупи денеска би можеле да стигнат до перифериите на Киев. Оттаму додаваат дека украинската војска ги брани позициите на четири фронта, иако е помалубројна.

Украинските борбени авиони утрово уништиле мост 50 километри северно од Киев за да се забави напредувањето на руските трупи.

„Оставени сме сами да ја браниме нашата држава, додека сојузниците гледаат оддалеку. Кој е подготвен да се бори заедно со нас? Не гледам никого. Кој е подготвен да ѝ даде гаранции на Украина за членство во НАТО? Сите се уплашени“, кажа Зеленски и ги повика источноевропските членки на НАТО да помогнат во одбраната.

Тој вели дека Русија го означила како главна мета.

„Тие сакаат да ја уништат Украина политички така што ќе го соборат шефот на државата. Јас останувам во седиштето на владата заедно со останатите. Непријателот ме означи како мета број еден, а моето семејство како мета број два“, изјави Зеленски.