Медицинската сестра од Клиниката за онкологија и радиотерапија, која на 28 февруари беше фатена при повторна кражба на лекови, доби отказно решение на 23 мај, а од 28 февруари не е стапната на Клиниката, рече денеска в. д. директорката д-р Виолета Клисаровска. Таа, заедно со министерот за здравство Фатмир Меџити и организацискиот директор Хаљид Матоши одржаа прес-конференција, откако Јавното обвинителство во петокот отвори предистражна постапка за криминална бизнис-мрежа за препродавање скапа биолошка терапија за лекување на болните од рак на клиниката.
Клисаровска, која е на функција од ноември 2022, кажа дека откако е таа директорка, сите пациенти ја добиваат потребната терапија, без никаква манипулација со лековите.
„Претходно имавме сомнежи, имаше допрен глас, беше јавна тајна дека недостасуваат лекови. Откако сум јас директорка, подигнато е нивото на безбедноста на патеката на лекот. Еднаш неделно имаме Онклошки конзилиум, на кој се состануваат сите 12 раководители на одделенија и за секој пациент се разговара и одлучува за текот на терапијата“, рече Клисаровска.
Таа повтори дека не дава втора шанса никому, без разлика дали е украден скап лек или физиолошки раствор. А за тоа зошто медицинската сестра била вратена на работа после првата кражба, таа кажа дека за тоа треба да одговори претходното раководство. Сестрата била ангажирана во дневната болница и не била директно вклучена со растворањето лекови.
На новинарско прашање зошто претходниот директор д-р Нино Васев денес дошол на работа, таа кажа дека нема добиено никакво решение од институциите за да биде отстранет од работа.
Меџити и Клисаровска замолија да не се шират непроверени информации, да се почекаат извештаи од институциите, со цел да не се создава немир и паника кај онколошките пациенти.
Поради откриениот криминал на Онкологија, денеска во 18 часот пред Владата е закажан граѓански протест.
Б. НЕСТОРОСКА
