Романската полиција ги пребара куќите на контроверзниот инфлуенсер Ендрју Тејт како дел од истрагата за новите обвинувања против него. Јутуберот веќе чека судење за силување и трговија со луѓе, но потенцијално сега може да се соочи со дополнителни обвиненија за секс и трговија со малолетни лица, како и за перење пари и обид за влијание врз сведоци, велат обвинителите.

Ендрју Тејт и неговиот брат Тристан, кои имаат огромни следбеници на социјалните мрежи, ги отфрлија сите претходни обвиненија против нив. Тие прво беа приведени во Романија во декември 2022, а потоа ослободени од домашен притвор во август 2023.

Според соопштението на Специјалното обвинителство на романската Дирекција за организиран криминал, во утринава биле претресени четири куќи во главниот град Букурешт и во округот Илфов. Оваа истрага се однесува на Ендрју Тејт и овие истраги траат подолго време.

Ендрју Тејт е самонаречен женомрзец и претходно беше забранет од платформите на социјалните мрежи поради изразување мизогински ставови. Тој постојано тврдеше дека романските обвинители немаат докази против него и дека има заговор да го замолчат.

Браќата Тејт, поранешни кик-боксери кои се двојни државјани на Обединетото Кралство и САД, се обвинети за експлоатација на жени преку бизнис со содржини за возрасни, за кои обвинителите тврдат дека работеле како криминална група. Во обвинението објавено во јуни минатата година, заедно со браќата беа именувани и две романски соработнички, а беа идентификувани седум жртви. Обајцата се бараат и во Обединетото Кралство во врска со одделни и неповрзани сексуални престапи извршени таму.