Руското Министерство за надворешни работи денеска „остро ги осуди“ американските воздушни напади врз иранските нуклеарни објекти, нарекувајќи ги „грубо кршење на меѓународното право, Повелбата на ОН и резолуциите на Советот за безбедност на ОН“. Во својата изјава на Телеграм, Министерството предупреди на потенцијални „радиолошки“ последици и рече дека нападите означуваат „опасна ескалација… полна со понатамошно поткопување на регионалната и глобалната безбедност“.
Кина остро го осудува нападот на САД врз Иран и врз нуклеарните постројки под надзор на Меѓународната агенција за атомска енергија, соопшти денеска кинеското Министерство за надворешни работи. Овој потег сериозно ја крши Повелбата на Обединетите нации и ги влошува тензиите на Блискиот Исток, соопшти Министерствот на својата веб-страница. Кина ги повикува страните во конфликтот, особено Израел, што е можно поскоро да ги прекинат нападите и да започнат дијалог и преговори, соопшти Министерството.
Нападите на САД врз иранските нуклеарни објекти го зголемија ризикот од ширење на регионалниот конфликт на глобално ниво, соопшти денеска турското Министерство за надворешни работи и додаде дека Анкара е длабоко загрижена за можните последици по нападите.
Во соопштението, Министерството рече дека ширењето на конфликтот во поширока глобална војна не смее да се дозволи, повикувајќи ги сите страни да дејствуваат одговорно и веднаш да ги прекинат нападите. Се вели дека само преговорите би можеле да го решат нуклеарниот спор меѓу Техеран и Вашингтон.
Бахреин и Кувајт, каде што се наоѓаат американски бази, денеска направија подготовки за можноста конфликтот во Иран да се прошири на нивна територија. Бахреин ги повика возачите да ги избегнуваат главните патишта и Кувајт да воспоставува засолништа во комплексот на министерствата по американските напади врз нуклеарните објекти на Иран.
Иран претходно предупреди дека ако биде нападнат од САД, може да ги нападне американските средства во регионот, вклучувајќи ги и американските воени бази.
Во Бахреин се наоѓа седиштето на Петтата флота на американската морнарица и има неколку американски бази во Кувајт.
Саудиска Арабија, регионалниот ривал на Иран, е во состојба на висока безбедносна тревога по нападите на САД врз Иран, изјавија за Ројтерс два извори запознаени со ова прашање.
Американските сили ноќеска ги нападнаа трите главни нуклеарни постројки на Иран, Натанц, Исфахан и Фордо каде се збогатува ураниум. Не е јасно дали САД ќе продолжат да го напаѓаат Иран заедно со својот сојузник Израел, кој девет дена војува со Иран. Трамп дејствуваше без одобрение од Конгресот и предупреди дека ќе има дополнителни напади ако Техеран возврати на американските сили.
