Претседателот на САД Доналд Трамп предложи семејното насилство да не се смета во официјалната статистика за криминалот, отфрлајќи ја сериозноста на брачната злоупотреба како „мала кавга со сопругата“. Трамп ги даде коментарите, кои предизвикаа брза реакција, додека дискутираше за неговата високопрофилна акција против криминалот во Вашингтон.

Трамп минатиот месец прогласи вонредна состојба во округот Колумбија на Вашингтон за да овозможи федерално преземање на полициската контрола во главниот град на земјата, испраќајќи ја Националната гарда и други федерални агенти за да им помогнат на локалните органи за спроведување на законот да се искорени урбаниот криминал.

Зборувајќи во Музејот на Библијата во Вашингтон, Трамп лажно тврдеше дека неговите мерки успеале целосно да го искоренат криминалот од округот.

„Нема криминал. Велат: ‘Криминалот е намален за 87 проценти’. Тоа е повеќе од 87 проценти – практично ништо“, рече Трамп.

Само во неделата, Вашингтон регистрираше едно убиство, шест кражби на моторни возила, два напада со смртоносно оружје, четири грабежи и повеќе од 30 инциденти на кражба, според „Њујорк тајмс“, кој се повикува на полициски податоци.

Во еден момент од говорот, Трамп изрази фрустрација што инцидентите на семејно насилство што се случуваат зад затворени врати се сметаат како дел од вкупниот број криминални дела во градот.

„Работите што се случуваат дома, тие ги нарекуваат криминал“, рече тој. „Тие ќе направат сè што можат за да најдат нешто. Ако мажот се скара малку со сопругата, тие велат дека ова било место на злосторство.“

Клип од изјавите на врховниот командант беше широко споделен на социјалните мрежи и предизвика гневен одговор.

„Само лежерно отфрлање на семејното насилство како кривично дело“, коментираше републиканскиот стратег Сара Лонгвел.

„На секои 11 часа умира по една жена од семејно насилство… па природно, Трамп работи прекувремено за да каже дека тоа не е вистина“, рече едно лице, додека друго едноставно објави фотошопирана слика од Трамп како го држи говорот облечен во бел маица без ракави, за да го карикира како насилен сопруг.

Трамп продолжува да инсистира дека криминалот е вон контрола во многу градови управувани од демократите, а во јуни ја испрати и Гардата во Лос Анџелес за да помогне во задушувањето на протестите против Имиграционата служба.