Генералното собрание на Обединетите нации вчера со огромно мнозинство гласаше за одобрување на декларација во која се наведени „опипливи, временски ограничени и неповратни чекори“ кон решение со формирање две држави меѓу Израел и Палестинците пред состанокот на светските лидери. Декларацијата од седум страници е резултат на меѓународната конференција во ОН во јули – организирана од Саудиска Арабија и Франција – за деценискиот конфликт. САД и Израел го бојкотираа настанот.

Резолуцијата за мирно решавање на палестинското прашање и спроведување на решението со формирање две држави, со која се одобрува декларацијата, доби 142 гласа „за“ и 10 „против“ меѓу кои и Унгарија, додека 12 земји беа воздржани меѓу кои и Македонија.

Гласањето е пред состанокот на светските лидери на 22 септември – на маргините на Генералното собрание на ОН на високо ниво – каде што се очекува Велика Британија, Франција, Канада, Австралија и Белгија формално да ја признаат палестинската држава.
Декларацијата, одобрена од Генералното собрание од 193 члена, ги осудува нападите врз Израел од страна на палестинските милитанти Хамас на 7 октомври 2023, што ја предизвика војната во Газа. Исто така, ги осудува нападите на Израел врз цивилите и цивилната инфраструктура во Газа, опсадата и гладот, „што резултираа со катастрофална хуманитарна катастрофа и криза на заштита“.

Францускиот министер за надворешни работи Жан-Ноел Баро рече дека резолуцијата обезбедила меѓународна изолација на Хамас.

„За прв пат денес, Обединетите нации усвоија текст со кој го осудуваат за неговите злосторства и повикуваат на негово предавање и разоружување“, рече тој во објава на Икс.

„Немојте да се лажете, оваа резолуција е подарок за Хамас“, изјави американскиот дипломат Морган Ортагус пред Генералното собрание. „Далеку од тоа што промовира мир, конференцијата веќе ја продолжи војната, го охрабри Хамас и им наштети на перспективите за мир и на краток и на долг рок“.

Израел, кој долго време ги критикуваше ОН за тоа што не го осудија Хамас по име за нападите од 7 октомври, ја отфрли декларацијата како еднострана и го нарече гласањето театар.

„Единствениот што има корист е Хамас… Кога терористите се тие што навиваат, вие не го унапредувате мирот; вие го унапредувате теророт“, рече израелскиот амбасадор во ОН, Дени Данон.

Во нападот на Хамас врз Израел на 7 октомври 2023 загинаа 1.200 луѓе, претежно цивили, а околу 251 беа земени како заложници, според израелските пресметки. Повеќе од 64.000 луѓе, исто така претежно цивили, оттогаш се убиени за време на војната во Газа, според локалните здравствени власти.