„Силјан“ на Тамара Котевска не влезе во потесниот избор за номинација за Оскар ниту во категоријата за Најдобар странски филм, каде беше македонски кандидат, ниту за Најдобар документарец.
Потесните листи за номинација за Оскар во 10 категории вечерва ги објави Американската академија за филмски уметности и науки, Од овој избор на 22 јануари ќе бидат објавени петте филмови кои ќе добијат номинација за Оскар во овие категории.
Кампањата за потенцијална номинација во двете категории почна откако во септември „Нешнл џиографик документари филмс“ (National Geographic Documentary Films), еден од најреномираните светски дистрибутери на документарци, го откупи „Силјан“ за прикажување, а на 28 ноември ја имаше американската кинопремиера во Њујорк.
Според потесните листи што вечерва ги објави Американската академија за филмски уметности и науки, во конкуренција за номинација за Најдобар документарец ќе бидат „The Alabama Solution“, „Apocalypse in the Tropics“, „Coexistence, My Ass!“, „Come See Me in the Good Light“, „Cover-Up“, „Cutting through Rocks“, „Folktales“, „Holding Liat”, „Mr. Nobody against Putin“, „Mistress Dispeller“, „My Undesirable Friends: Part 1 – Last Air in Moscow“, „The Perfect Neighbor“, „Seeds“, „2000 Meters to Andriivka“ и „Yanuni“.
Во категоријата Најдобар странски филм на потесната листа се „Belén (Аргентина), „The Secret Agent“ (Бразил), „It Was Just an Accident“ (Франција), „Sound of Falling“ (Германија), „Homebound“ (Индија), „The President’s Cake“ (Ирак), „Kokuho“ (Јапонија), „All That’s Left of You“ (Јордан), „Sentimental Value“ (Норвешка), „Palestine 36“ (Палестина), „No Other Choice“ (Јужна Кореја), „Sirât“ (Шпанија), „Late Shift“ (Швајцарија), „Left-Handed Girl“ (Тајван) и „The Voice of Hind Rajab“ (Тунис).
Доделувањето на Оскарите е на 15 март.
„Силјан“ имаше светска премиера на годинешниот Венециски фестивал, вон конкуренцијата за награди во документарната програма. Пред две недели освои две награди на Меѓународната Асоцијација за документарни филмови – ИДА за најдобар документарен филм и најдобра камера, а доби и номинација за најдобар филм за престижната американска награда Независен дух (Independent Spirit), која е предвесник на Оскарите. Доби и номинација за награда на Здружението на продуценти на Америка (Producers Guild of America -PGA). Котевска и кинематограферот Жан Дакар, кои се продуценти на филмот, се номинирани во категоријата Најдобар продуцент на документарен филм.
Во 2020, документарецот „Медена земја“ на Котевска и Љубо Стефанов имаше историски две номинации за Оскар, како прв филм што беше номиниран и за Најдобар документарец и за Најдобар странски филм.
