Премиерот Христијан Мицкоски изјави дека Македонија е меѓу водечките земји во Европа според обемот на преземени мерки за справување со енергетската и ценовната криза. Тој се повика на податоци од Меѓународниот монетарен фонд објавени на 15 април, според кои државата се наоѓа на третото место на континентот според применетите мерки како процент од бруто-домашниот производ.

На денешната прес-конференција, Мицкоски рече дека во услови на глобална неизвесност и геополитички превирања на Блискиот Исток, владата презема чекори за амортизирање на последиците врз граѓаните. Тој најави дека Регулаторната комисија за енергетика утре се очекува дополнително да ги намали малопродажните цени на нафтените деривати во просек за околу 1,5 денар по литар. Дополнително, во сила останува договорениот попуст со „Окта“ до крајот на април, кој изнесува два денари за бензините и три денари за дизел горивото.

На прес-конференцијата беше претставена и споредба со земјите од регионот, каде што цените на горивата во државата се движат од 1,27 до 1,31 евро за литар. Според премиерот, овие износи се убедливо најниски во споредба со Грција и Албанија каде надминуваат два евра, како и со Србија, Бугарија, Хрватска и Словенија.

Тој ги отфрли обвинувањата од СДСМ и ДУИ за наводно доцнење со мерките и лошо менаџирање со буџетот. Мицкоски изјави дека претходната власт изнесувала невистини за мигрантите, состојбата на пензиите и инфлацијата. Според неговите зборови, инфлацијата во моментов изнесува 4,9 отсто, што е значителен пад во однос на 2022 година кога стапката беше двоцифрена.

Мицкоски очекува дека од мај состојбата целосно ќе се стабилизира и дека владините политики на прилагодување на даноците и акцизите ќе продолжат да ги штитат потрошувачите од шоковите на светските берзи.