Најмалку 90 лица загинаа во експлозија во рудник за јаглен во северна Кина, според државните медиуми во земјата. Експлозијата на гас се случи во рудникот за јаглен Лиушенју, управуван од групацијата „Тонгжу“, во покраината Шанкси.

Стотина спасувачи се испратени на местото. Снимките од државните медиуми покажаа болничари кои носеа носилки на местото, а амбулантните возила се во позадина. Спасувачките операции на местото се во тек. Експлозијата се случи вчера во 19:29 часот по локално време во рудник за јаглен во Шанкси, при што 247 работници биле на должност во времето на инцидентот.

Кинеското Министерство за управување со вонредни состојби испрати 345 лица во шест спасувачки екипи за да помогнат во операцијата за спасување.

По инцидентот, кинескиот претседател Шји Џинпинг повика да не се штеди ништо во напорите за лекување на повредените и потрагата по преживеани.Тој, исто така, побара од владата да ја испита причината за несреќата и да ги повика одговорните на одговорност.

Службениците што го водат рудникот за јаглен се приведени, според државните медиуми. Причината за експлозијата на гасот сè уште не е откриена, но државните медиуми објавија дека нивоата на јаглерод моноксид, високотоксичен гас без мирис, во рудникот биле „надминати“.

На почетокот на 2000-тите, фаталните несреќи беа чести во кинеската индустрија за рударство на јаглен, но во последниве години безбедносните стандарди се заострени.