Денеска е пуштен во употреба чилишен базен во Општина Карпош, до спортската сала „Партизан“. Станува збор за базен со длабочина од 0,80 до 1,20 метри, со ширина од 9 метри и должина од 25 метри. Базенот се градеше со средства од Агенцијата за млади и спорт и чини околу 760.000 евра.

Денеска беше предаден во владение на Општина Карпош.

На свеченоста за отварањето на базенот присуствуваа премиерот Христијан Мицскоски, министерот за спорт и млади Борко Ристовски, заменик-градоначалникот Неделчо Крстевски, но не дојде градоначалникот Сотир Лукровски, кој уште е на боледување.

• ЛУКРОВСКИ Е НА ШОПИНГ-ТЕРАПИЈА, РЕЧЕ ЈАКИМОВСКИ И ГО ПОВИКА КЛЕКОВСКИ ДА ГИ ПРОВЕРИ КАМЕРИТЕ ВО „СИТИ МОЛ“ ЗА БОЛЕДУВАЊЕТО НА ГРАДОНАЧАЛНИКОТ НА КАРПОШ
• САМО РАБОТОДАВАЧОТ ЛУКРОВСКИ МОЖЕ ДА ПРОВЕРИ ВО ФЗО ДАЛИ Е ЛАЖНО БОЛЕДУВАЊЕТО НА ГРАДОНАЧАЛНИКОТ ЛУКРОВСКИ

Премиерот Мицкоски не сакаше да одговори на прашањето до кога ќе биде на боледување Лукровски, со оглед дека отсуствува од работното место еден месец.

„Тоа се лични моменти и не би сакал да коментирам и ги осудувам сите оние политички глодари коишто на туѓата мака се обидуваат да добијат политички поени“, изјави Мицкоски.

Лукровски е на боледување од 7 мај. Боледувањето од матичен лекар му траеше две недели и после тоа треба да му биде продолжено од надлежна лекарска комисија.

Ексградоначалникот Стевчо Јакимовски на 26 мај на прес-конференција изјави дека актуелниот градоначалник Сотир Лукровски боледува од неработење и неодговорност и оти се шета низ трговскиот центар „Сити мол“ додека му трае боледувањето.

• ЛУКРОВСКИ НЕ ПОДНЕЛ ОСТАВКА, ТУКУ Е НА БОЛЕДУВАЊЕ, ВЕЛАТ ОД ОПШТИНА КАРПОШ

• ВМРО-ДПМНЕ ГО СТАВИ ЛУКРОВСКИ ВО КУЌЕН ПРИТВОР, ВЕЛИ ЕКСГРАДОНАЧАЛНИКОТ ЈАКИМОВСКИ

„Во Македонија се појави нова медицинска гранка, ниту е кардиологија, ниту е неврологија, ниту е психијатрија. Во Македонија изгледа се појави таа нова медицинска гранка што се вика ‘шопинг-медицина’. Новата терапија, очигледно, се спроведува околу ‘Сити мол’ и во ‘Сити мол’. Малку во ‘Ејч енд ем’ малку во ‘Зара’, па прошетка покрај ‘Нептун’ до горните гаражи, па од тука на комисиско боледување. И сето тоа на товар на граѓаните“, рече тогаш Јакимовски.

А. АНТЕВСКА