Португалија победи со 2:1 и ја елиминираше Хрватска во 1/16-финалето на Светското првенство во САД, Канада и Мексико откако во драматична и контроверзна завршница им беше поништен гол на Хрватите во 13. минута од судиското надополнување.

Хрватските играчи и навивачи лудо славеа откако Јошко Гвардиол одблиску го совлада португалскиот голман и се чинеше дека мечот неочекувано ќе оди во продолженија, но набргу потоа најновата технологија на ФИФА покажа дека неговиот соиграч и асистент за голот Марко Пашалиќ бил во офсајд. Пашалиќ очигледно се наоѓаше во недозволена позиција, но големото прашање беше дали Игор Матановиќ ја допрел топката со глава пред да дојде до него. Ако не, голот ќе беше признат.

Норвешкиот судија Еспен Ескас ја гледаше повторената снимка од моментот, но таа не можеше јасно да го покаже тоа. Но, скокот што го покажала новата сензорска технологија во топката сугерираше допир од Матановиќ и голот беше поништен. Микрочипот во топката може да открие кога топката е допрена и овозможува прецизни податоци, што се испраќаат до ВАР-собата во реално време.

Одлуката предизвика хаотични сцени, а бесните хрватски навивачи фрлаа пластични шишиња на теренот, што беше само кулминација на неверојатниот меч што го одиграа двете екипи, во кој имаше и поништени голови, дискутабилен пенал за Португалија и гол во 94. минута.

На тој начин продолжува сонот на Кристијано Роналдо, а заврши за Лука Модриќ, двајца 40-годишници, кои одлучија уште еднаш да ги предводат своите репрезентации на мундијалската сцена.

„Нема да коментирам многу за поништениот гол, но ќе кажам дека судењето беше многу лошо. Можевте да видите до кој степен беа убиени емоциите. Сите овие одлуки ве враќаат назад и ја одземаат радоста од фудбалот. ВАР ги убива емоциите, отидовме предалеку со ВАР“, рече хрватскиот селектор Златко Далиќ.