Судијката Лидија Петровска може да го осуди во отсуство обвинетиот ексначалник на Петтата управа во МВР Горан Грујевски кој е во бегство, потврди за САКАМДАКАЖАМ.МК в.д. претседателот Стојанче Рибарев, но тој појаснува дека тоа не зависи од неа, туку од обвинителот од Специјалното јавно обвинителство.
На 26 септември треба да продолжи рочиштето против Грујевски, кој е обвинет за незаконско палење на над 20.000 документи, списи од Управата за безбедност и контраразузнавање, кои биле докази дека нелегално се прислушувале десетици политичари, функционери, новинари, граѓани невладини активисти и бизнисмени.
На прашање дали на следното рочиште на 26 септември, Петровска може да донесе решение за да му се суди на Грујевски во отсуство, Рибарев се повикува на Законот за кривична постапка и вели:
„За да постапува судот во конкретен предмет, мора да има писмено известување дали обвинетиот е достапен на органите на прогон или не. Ако лицето не е достапно, согласно член 365 став 3 од ЗКП, на обвинетиот може да му се суди во отсуство само ако е во бегство или е недостапен на државните органи, а притоа постојат особено важни причини за да му се суди во отсуство. Решение за да му се суди во отсуство носи судот на предлог на овластениот тужител“.
Ова значи дека ако СЈО не побара судењето да продолжи во отсуство на избеганиот Грујевски, тоа ќе се одложи поради отсуство на главниот обвинет и ќе се презакаже.
Овој судски процес се одолговлечи повеќе од една година, иако се води како брза и економична постапка, бидејќи се работи за обвинителен предлог, за дело за кое е пропишана казна затвор до 5 години.
Горан Грујевски е избеган откако Апелациониот суд Скопје му одреди притвор за други, потешки кривични дела. Јавноста дозна дека е избеган на 26 јули годинава, кога МВР отиде да го спроведе во затворот Шутка.
Таа вечер, полицијата не го најде дома ни Никола Бошкоски, раководно лице од УБК, кој заедно со првообвинетиот Грујевски доби мерка притвор од Апелациониот суд Скопје, како главни обвинети за нелегалното прислушување , во предметите на СЈО „Тврдина“ и „Таргет“.
Од 30 јули годинава, Грујевски и Бошкоски се објавени на веб сајтот на МВР, во делот „Потраги“, а за нив е распишана меѓународна потерница.
Според објавените профили, вработениот во УБК Никола Бошкоски „се бара по Наредба на Апелационен Суд Скопје во врска со истрага за кривични дела ‘Злоупотреба на службена положба и овластување’ чл. 353 ст. 5 в.в. ст.1 в.в. чл. 24 и ‘Фалсификување службена исправа’ чл. 361 ст. 2 в.в. ст. 1“, а ексначалникот на Петтата управа во МВР Горан Грујевски „се бара по Наредба на Апелационен Суд Скопје во врска со истрага за кривични дела ‘Злоупотреба на службена положба и овластување’ чл. 353 ст. 5 в.в. ст.1 в.в. чл. 24 и , ‘Фалсификување службена исправа’ чл. 361 ст. 2 в.в. ст. 1“.
С. К. ДЕЛЕВСКА
