Премиерот Зоран Заев уверува дека никој нема да биде изземен од одговорност за корупција, во видео обраќањето по повод Меѓународниот ден за борба против корупцијата. Тој вели дека коруптивното дејствување е сериозна закана за економскиот и за севкупниот развој на Македонија и дека борбата со ова зло е обврска што ја презела оваа власт, но ги повика и граѓаните да учествуваат рамноправно во справувањето.

„Нашата Влада и јас како премиер, но и сите претставници на локалната власт, како и претставниците од граѓанскиот сектор и од приватниот сектор, имаме одговорност да се справиме со сериозните предизвици  што корупцијата ги поставува пред нас. Корупцијата е закана за воспоставување на владеење на правото, а ние презедовме обврска дека во Македонија ќе владее правото. Затоа, мораме да дејствуваме одлучно и со нула толеранција кон корупцијата. Ве охрабрувам и вас, активно да се вклучите во oваа заедничка борба, преку пријавување на корупцијата и без страв од последици. Со ова јасно укажувам дека никој нема да биде изземен од одговорност“, рече Заев и дидаде дека од успехот на борбата против корупцијата, зависи успехот на државата.