„Господ постои, името ѝ е Петрунија“, петтиот филм на Теона Стругар Митевска, влезе во конкуренција за престижната Златна мечка на годинашниот 69. Берлински филмски фестивал. Ова е првпат македонски филм да е во трката за награда на Берлинале, а светската премиера на филмот ќе биде на 10 февруари, објави денеска продуцентката и актерка во филмот Лабина Митевска во Агенцијата за филм.
По вонсерискиот успех на „Пред дождот“ на Милчо Манчевски кој во 1994 го освои Златниот лав во Венеција, ова е прво учество на Македонија во конкуренцијата за награди на еден од трите најголеми фестивали во светот, Кан, Берлин или Венеција.
Со жирито за Златна мечка на Берлинале годинава претседава оскаровката Жилиет Бинош, која во 2014 дојде во Битола да ја прими наградата за придонес кон светскиот филм на фестивалот „Браќа Манаки“, чија директорка тогаш беше Лабина Митевска
Берлинале ќе се одржи од 7-17 февруари, а со жирито за Златна мечка претседава оскаровката Жилиет Бинош. Француската актерка во 2014 дојде во Битола да ја прими наградата за придонес кон светскиот филм на фестивалот „Браќа Манаки“, чија директорка тогаш беше Лабина Митевска.
Филмот е инспириран од настанот што се случи на Водици 2014, кога Борислава Васкова го фати крстот фрлен во реката Брегалница во штипско Ново Село. Инспирацијацијата е од случајот и христијанското табу и дилеми дека жена не треба да се фрла по светиот крст исто како што не може да влегува во олтарот во црква.
Од снимањето во Штип на „Господ постои, име ѝ е Петрунија“, петтиот игран филм на Теона Стругар Митевска (лево), инспириран од настанот на Водици 2014, кога Борислава Васкова го фати крстот фрлен во реката Брегалница во штипско Ново Село (десно) (Фото: СДК.МК)
„Во Штип, секој јануари локалниот свештеник фрла дрвен крст во реката, а стотици мажи со нуркање сакаат да дојдат први до него. Среќата и просперитетот се загарантирани на човекот кој ќе го фати прв. Петрунија неочекувано се фрла во водата од каприц и успева да го фати крстот пред другите. Нејзините конкуренти се бесни – како се осмелува жена да учествува во нивниот ритуал? Настанува општ хаос, но Петрунија опстојува на своето. Таа го освои својот крст и нема да се откаже“, вела од продукцијата „Сестри и брат Митевски“ за приказната на филмот.
Продуцентката Лабина Митевска вели дека филмот, во сѐ уште незавршена форма, бил прикажан на комисијата на Берлинал на 3 декември, а поканата за селекцијата стигнала на 11 декември.
„Во писмото од директорот на фестивалот Дитер Кослик стои: ‘Каков прекрасен филм, целата комисија беше видно импресионирана од вашето дело. Ве молам примете ги моите честитки. Ве молам примете ја мојата покана за учество на филмот со вашиот фантастичен каст и екипа. Многу ќе бидам среќен да ве дочекам на црвениот тепих со вашиот фантастичен филм’, рече Митевска на денешната прес-конференција.
„Ова е добиено со многу труд и многу работа, голема посветеност и макотрпно градење на репутација на бескомпромисен, смел и особен уметнички израз и филмски јазик на Теона Стругар Митевска. Јас сум убедена дека и претходните нејзини филмови заслужуваа ваков пласман, но едноставно ваков пробив не доаѓа брзо и едноставно. Со ова потенцирам дека стилот и јазикот кои што ги негува Теона се навистина специфични, можеби требаше време, повеќе од колку што ние би сакале, се разбира, но сепак, конечно е направен и тој пробив“, рече Митевска.
„Господ постои, името ѝ е Петрунија“ е македонско-француско-белгиско-словенечко-хрватска копродукција (Фото: Агенција за филм на РМ)
„Господ постои, името ѝ е Петрунија“ е македонско-француско-белгиско-словенечко-хрватска копродукција. Поддржан е од Еуримаж со 224 илјади евра и од Медиа фондот за развој на проекти. Буџетот на филмот е 1.400.000 евра, а од македонската Агенција за филм доби 487 илјади евра.
Филмот се снимаше шест недели во Штип во јануари и февруари 2018. Монтажата се одвиваше во Белгија, звукот, лабораторијата и музиката се работеа во Белгија, Франција и Словенија.
Косценаристка на Стругар Митевска е Елма Татарагиќ, директор на фотографија е Вирџини Сант Мартен од Белгија, сценограф е Вук Митевски, костимите на Моника Лорбер и шминката на Мојца Горогранц Петрушевска. Монтажерка на филмот е Мари Хелен Дозо, а дизајнер на звукот Ингрид Симон. Кастингот е на Киријана Николовска, прв асистент на режија Јане Ќортошев, директор на филм Елена Станишева.
Главната улога ја игра Зорица Нушева, а во екипата се и Симеон Мони Дамевски, Суад Беговски, Стефан Вујисиќ, Џевдет Јашари, Виолета Шапковска, Андријана Колевска, Петар Мирчевски, Бајруш Мјаку, Илија Волчевски, Никола Кумев, Лабина Митевска, Игор Тодоров, Ненад Ангелковиќ, Владимир Тулиев.
За европската и светска дистрибуција е случен договор со францускиот „Пирамид“, а „Господ постои“ ќе биде трет македонски филм кој ќе има кинодистрибуција во Франција, по „Пред дождот“ и „Јас сум од Титов Велес“.
Ова е четврт долгометражен филм на Митевска кој е на Берлинале, во 2001 кусиот „Вета“ беше во конкуренцијата за краток филм, а во програмата Панорама во 2008 играше „Јас сум од Титов Велес“, во 2012 играше „Жената која ги избриша своите солзи“, а во 2017 „Кога денот немаше име“.
Б. НЕСТОРОСКА
