Доналд Трамп предлагал на мигрантите да им се пука во нозе, се вели во новата книга што ја објавија двајца новинари на „Њујорк тајмс“.

Книгата насловена „Гранична војна: среде војната на Трамп против имиграцијата“, напишана од Мајкл Шир и Џули Дејвис, е заснована на интервјуата со десетина неименувани функционери и ги опишува настаните од март 2019, кога Трамп се обиде целосно да ја запре миграцијата на јужната граница на САД.

Според книгата, Трамп предложил на мигрантите да им се пука во нозете за да не можат да бегаат, но му било кажано дека тоа не е законски. Тој наводно предложил и други драстични мерки, како градење електрифицирана шилеста ограда и копање ровови со алигатори.

„Приватно, Трамп често зборуваше за утврдување на границата со ровови исполнети со вода, алигатори и змии, а сакаше и електрифицирана ограда со шилци на врвот, на кои би можело да прободе човечко тело“, се вели во книгата.

Изградба на ѕид на американско-мексиканската граница беше едно од најголемите предизборни ветувања на Трамп. Таа почна откако од средствата на Пентагон беа обезбедени 3,6 милијарди долари.

Белата куќа досега не ги коментираше наводите од книгата што ја објави „Њујорк тајмс“.