Изгоре уште еден двокатен кинески автобус на ЈСП „Скопје“. Како што соопшти јавното претпријатие, неколку минути пред пладне избувнал пожар во автобус на линијата 57. Нема повредени патници, причинета е само материјална штета.
„Во моментот на опожарувањето, автобусот бил на последната постојка во Нерези и во него немало патници. Внатрешната контрола на ЈСП ‘Скопје‘ веднаш излезе на терен, при што од изјавата на возачот и сведоци, констатираше дека пожарот избувнал во делот кај што се наоѓа моторот. Благодарение на присебноста на возачот и неговата брза реакција, избегната е поголема штета“, велат од ЈСП „Скопје“.
Покрај возачот, во гасењето на пожарот интервенирало и Пожарната единица на Град Скопје со едно возило.
Ова не е првпат да се запали кинески двокатен автобус. Лани во ноември се запали автобус на линијата 7, а пред две години на линијата 5 во населбата Ѓорче Петров. И во двата случаи пожарот избувна во делот кај моторот.
А. АНТЕВСКА
