Градоначалничката на Скопје Данела Арсовска рече дека лидерот на ВМРО-ДПМНЕ  Христијан Мицкоски е рекет број еден и е пред Новак Ѓоковиќ. На дискусијата на седницата на Советот на Град Скопје за состојбата на опожарениот мост „Беласица“, советничката од ВМРО-ДПМНЕ Марија Андоновска кажа дека не добиле никакви информации за состојбата на мостот, ни писмена ниту усна.

На ова Арсовска ѝ реплицираше: „Рекет број 1 пред Новак Ѓоковиќ е Христијан Мицкоски. Точка“, рече Арсовска.

Тогаш претседателот на Советот Трајко Славески ѝ реплицираше дека на првите две места има други двајца тенисери, а во моментов Новак Ѓоковиќ е на трето место на АТП листата.

„Зборам за нашиве простори тука, најсакан рекет е Новак Ѓоковиќ, но за жал тој е само на второ место. После Христијан Мицкоски. Мицковизмот си заминува во историјата, госпоѓо Марија. Не квалификувајте, знаат граѓаните која е најкримналната структура, најкриминалната партија во државата. И тие што не знаеле, дознале“, реплицираше Арсовска.

„Ако продолжиме вака ќе дојдеме до Девојачки мост“, реагираше Славески.

Потоа, продолжија караниците меѓу Арсовска и ВМРО-ДПМНЕ, кој бил криминалец, кој местел тендери и кој фатен со рацете во мед. За мостот кажа дека се вршат испитувања и до тогаш не можат да кажат во каква состојба е.

ВМРО-ДПМНЕ на чело со Мицкоски ја поддржа Арсовска кога се кандидираше за градоначалничка на Скопје и тој настапуваше заедно со неа во изборната кампања. Лани во март, Арсовска кажа дека заедно со Мицкоски бараат грантови за еко проекти за набавка на еко автобуси.

А. АНТЕВСКА