Новогодишното украсување на Скопје уште не е ни почнато. На плоштадот Македонија и главните улици низ центарот на градот нема ниту еден новогодишен украс, ниту пак екипи работат на поставување на украсите и елките.

Иако изминатите години со украсувањето Град Скопје почнуваше уште кон крајот на ноември за градот во новогодишни бои да светне до средината на декември, годинава дури на 15 декември ќе почне украсувањето.

Градоначалникот Петре Шилегов вели дека на 15 декември ќе се почне да се украсува бидејќи уште не е завршена тендерската процедура.

„Беше сопрена постапката за избор на фирма која ќе го украсува градот оти во тендерот беше вклучен и огномет за прославата на новогодишната ноќ. Бидејќи се откажавме од прославата и парите решивме да се донираат на Клиниката за белодробни заболување Козле, го исклучивме огнометот. Во тек е жалбената постапка, која ќе заврши до крајот на неделава по што ќе биде склучен договорот и ќе почне китењето“, вели градоначалникот Петре Шилегов.

Од буџетот на Градот за новогодишно украсување ќе се издвојат околу 5 милиони денари.

Пред еден месец градоначалникот Шилегов изјави дека прослава ќе нема и наложил на веќе договорените спонзори, парите, односно околу 50.000 евра да се донираат на Детската болница Козле.

Ниту скопските општини досега не почнале со украсување на главните улици и плоштади на нивната територија. Минатите години речисе сите општини издвојуваа пари за поставување на новогодишни елки и украси.

Општина Центар најави дека и годинава ќе имаат новогодишна прослава на сквер Јадран, а парите ќе се обезбедат од спонзори.

А. АНТЕВСКА