ОБВИНИТЕЛСТВОТО БАРА ПРИТВОР ЗА ВЕЛЕШАНЕЦОТ КОЈ ВОЗЕЈЌИ ПИЈАН ПРЕГАЗИ 11-ГОДИШНО ДЕВОЈЧЕ НА ПЕШАЧКИ ПРЕМИН И ИЗБЕГА

    ОБВИНИТЕЛСТВОТО БАРА ПРИТВОР ЗА ВЕЛЕШАНЕЦОТ КОЈ ВОЗЕЈЌИ ПИЈАН ПРЕГАЗИ 11-ГОДИШНО ДЕВОЈЧЕ НА ПЕШАЧКИ ПРЕМИН И ИЗБЕГАВелешанецот возел пијан и со голема брзина и удрил во мајка и ќерка на пешачки премин во Велес. (Фото: СДК.МК)

    Велешкото обвинителство побара притвор за 29-годишниот велешанец А. Н. кој возејќи пијан, прегази 11-годишно девојче на пешачки премин во Весел и избега. Тој денеска беше уапсен по 40 часа во бегство, а Јавен обвинител од Основното јавно обвинителство Велес донесе Наредба за спроведување истражна постапка под сомнение дека сторил кривично дело – Тешки дела против безбедноста на луѓето и имотот во сообраќајот согласно член 300 став 2 во врска со член 297 став 1, како и кривично дело – Неукажување помош на лице повредено во сообраќајна незгода од член 301 став 2 од Кривичниот законик.

    „Како учесник во сообраќајот, осомничениот на 17 декември под дејство на алкохол управувал автомобил ‘мерцедес’ со велешки регистарски ознаки. На улицата Борис Трајковски во Велес, приоѓајќи на обележан пешачки премин, тој не го управувал возилото со соодветна брзина која дозволува да запре во случај на потреба и не обрнал внимание на пешаците – мајка и ќерка кои во тој момент поминувале на пешачкиот премин. Со автомобилот тој удрил во мајката која паднала на земја и се здобила со телесна повреда – отворена рана на челото и во 11-годишното девојче кое од ударот било исфрлено десетина метри напред кон следниот пешачки премин, паднало и се здобило со тешки телесни повреди од кои починало на лице место. По несреќата, осомничениот не застанал да им укаже помош, туку продолжил со несмалена брзина да се движи кон населбата Превалец“, соопшти Обвинителството.

    Надлежниот јавен обвинител вечерва до Основниот суд во Велес достави предлог за определување притвор за да се обезбеди неговото присуство и непреченото одвивање на кривичната постапка.

     

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира