ПАТНИЧКИОТ ВОЗ ЗА БИТОЛА КАЈ ВЕЛЕС УДРИЛ ВО ЧОВЕК, КОЈ ИЗБЕГАЛ ПО ИНЦИДЕНТОТ ОТИ ГО БАРАЛА ПОЛИЦИЈА

    ПАТНИЧКИОТ ВОЗ ЗА БИТОЛА КАЈ ВЕЛЕС УДРИЛ ВО ЧОВЕК, КОЈ ИЗБЕГАЛ ПО ИНЦИДЕНТОТ ОТИ ГО БАРАЛА ПОЛИЦИЈАКога полициски екипи дошле на местото на настанот, човекот го немало, вели полицијата. (Фото: СДК.МК)

    Вечерниот патнички воз од Скопје за Битола во саботата тој удрил во лице кое било на пругата кај Велес, потврдија од Македонски железници (МЖ) и од СВР Велес, а за случајот алармираа малкуте патници кои се затекнале во возот. Инцидентот се случил околу 21,10 часот на излеот од Велес во правец на Битола, на пругата близу основното училиште „Васил Главинов“.

    „Местото е во кривина, но машиновозачот свиреше бидејќи го видел лицето кое било на пругата. Откако закочи и возот застана, службите лица на МЖ, машиновозачот, кондуктерот излегоа, а лицето кое беше удрено, маж на 50-тина години, немаше видливи повреди. Тој објаснуваше дека се криел од полиција, бидејќи ја нападнал сопругата и сега го барале. По некое време, човеков исчезна. Кога дојде полицијата го немаше“, кажува патник од патничкиот воз, сведок на настанот.
    Тој бил еден од 30-тината патници во возот. Дома на железничката станица во село Мартолци бил во 1,30, а возот требало да пристигне во 21,35ч. Од МЖ кратко кажаа дека се случил инцидент, откако лице кое било на пругата било удрено.

    „Според прописите, настанот мора да се пријави во полиција, што од страна на службените лица од патнички воз било сторено. Кога тие дошле, оштетениот го немало“, велат од МЖ.

    За инцидентот сведочат и станарите од околните згради, кои се чудат како патниците од возот издржале со часови додека траел увидот.

    „Се гледаше од светлата на возот дека има луѓе во него. Додека седев до полноќ, возот не беше тргнал“, вели станар од околната зграда, позната како Топилничарска.

    Од велешката полиција потврдија дека примиле пријава за инцидент на пругата Велес-Битола, на подрачјето на град Велес.

    „Добиена е пријава дека патнички воз за Битола удрил во лице, кој во тоа време било на пругата. Кога полициски екипи дошле на местото на настанот, човекот го немало“, кажа Верољуб Додевски портпарол на СВР Велес.

    П. ПЕЧКОВ

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира