Од есенва, сите ученици кои посетуваат паралелки со дуално образование ќе добиваат по 3.500 денари месечен надомест, додека најдобрите 200 ученици од машинска и електротехничка струка по 2.000 денари месечно. Ова го кажа министерката Мила Царовска, при денешната посета на две средни стручни училишта од Велес, каде има или од есен ќе има паралелки со дуално образование со практична настава.

„Да понудиме образование кое ќе ги носи учениците до вработување, полесно да се запишат на техничките факултети и кај овие ученици се развива претприемачкиот дух. Овие ученици со добиеното знаење можат да основат компании и да станат работодавачи, не само вработени. Учениците оваа стипендија ќе ја добиваат девет месеци“, рече Царовска.

Иницијаторот за дуалното образование во земјава е Делегацијата на Германското стопанство во Македонија. Во средното училиште „Коле Неделковски“ во Велес има две вакви паралелки во прва и втора година, со околу 40-тина ученици

П. ПЕЧКОВ