Над 20 филмски фестивали низ светот се споија и бесплатно ќе прикажуваат филмови на Јутјуб, откако пандемијата на коронавирусот ги затвори киносалите, а мораше да се одложат и фестивалите во Кан и Трајбека во Њјуорк.

Десетдневниот стриминг насловен „Ние сме едно: Глобален филмски фестивал“ ќе почне на 29 мај и ќе содржи филмови, меѓудругите, од фестивалите во Берлин, Кан, Венеција, Санденс, Торонто и Трајбека, соопштија организаторите „Трајбека ентерпрајз“ и Јутјуб. Ќе учествуваат и фестивалите од Ерусалим, Сараево, Сиднеј, Токио и Лондон.

Ќе се прикажат филмови, документарци, комедии, ќе има музика и разговори, но повеќе детали сѐ уште не се објавени. Малку е веројатно, сепак, дека ќе се прикажат и премиери.

Засега е познато дека Канскиот фестивал кој се одржува во мај е одложен, а неизвесно е одржувањето на филмските фетсивали во Венеција и Торонто во септември.

Филмовите ќе може да се гледаат бесплатно, но ќе има можност да се донираат средства за солидарниот фонд за КОВИД-19 на Светската здравствена организација (СЗО).