Секој збор на Блаже Конески истовремено е и порака и аманет, наша должност, наша обврска е да не заборавиме да ги пренесуваме на идните генерации како аманет кон нив, вели министерката за култура Ирена Стефоска, за денешното одбележување на 100 години од раѓањето на еден од великаните на македонската култура. Денот на кој се родил овој исклучителен културен деец е запишан и на Листата на УНЕСКО за одбележување значајни јубилеи во светот во текот на 2021 година.

Генералното собрание на Обединетите нации ја прогласи 2021 година за Меѓународна година на мирот и довербата за да ги мобилизира напорите на меѓународната заедница да се обезбеди траен мир, солидарност и хармонија.

Министерството за култура и Министерството за образование и наука (МОН) се приклучија кон иницијативата со програма посветена на Конески. Во меѓународната програма се вклучи и Министерството за надворешни работи (МНР), а покровител на програмата во Македонија е претседателот Стево Пендаровски.

Марката е илустрирана со портретот од уметникот Димитар Кондовски, отпечатена е во 6 илјади примероци, во вредност од 72 денара. (Фото: К. Попов)

Се организираа голем број настани, како на пример, во март во седиштето на УНЕСКО во Париз, кога високи дипломати читаа негова поезија, во април во оптек беше пуштена поштенска марка со неговиот лик, во јули беа промовирани аудиовизуелни записи од неговата поезија. Во Кинотеката во септември имаше проекции на документарни филмови во негова чест, а беше претставен мурал на површина од 20 квадратни метри, дело на уметникот Дејвид Стоилковски-Молерај од Куманово, автор на бројни мурали и графити.

Утре во 11 часот, во Македонската академија на науките и уметностите (МАНУ)  ќе има свечен собир, а во 19 часот во Филхармонијата ќе се одржи завршната манифестација со која ќе биде заокружено чествувањето на „2021 – Година во чест на Блаже Конески“.

Оркестарот ќе изведе концерт инспириран од творештвото на Конески, а меѓу делата кои ќе се изведат се „Молитва“ од Тодор Скаловски и „Записи“ од Томислав Зографски. Оркестрацијата е на Ангел Спировски, ќе пее баритонот Горан Начевски.

Во фоајето на Филхармонијата, ќе биде поставена изложбата на илустрации пристигнати на конкурсот објавен од Факултетот за ликовни уметности за изработка на јубилејната книга „Блаже Конески поезија и кратка проза“, во издание на Струшките вечери на поезијата (СВП). Влезот за концертот е слободен.

• СО „ТИШИНА“ И МУРАЛОТ НА КОНЕСКИ САКАВ ДА ПОКАЖАМ ДЕКА ДОПРВА ТРЕБА ДА ИСТРАЕМЕ, ВЕЛИ ДЕЈВИД СТОИЛКОВСКИ-МОЛЕРАЈ
• ЈУБИЛЕЈОТ ОД РАЃАЊЕТО НА КОНЕСКИ ДА НЕ ГО КОРИСТИМЕ ЗА МИНАТОТО, ТУКУ ЗА МУДАР ЧЕКОР КОН ИДНИНАТА, РЕЧЕ СТЕФОСКА

Во време на политички превирања за потеклото на македонскиот јазик, лингвистите во интервју за Државната агенција МИА истакнуваат дека не треба, апсолутно, да има дилема – македонскиот јазик е идентитет на државното и народно опстојување.

Професор д-р Лидија Тантуровска од Институтот за македонски јазик „Крсте Петков Мисирков“ од Скопје вели дека дека македонскиот јазик постои со векови, а неговото негирање очигледно е политичко прашање.

„Значи, македонскиот јазик постои на овие простори со векови, но за кодифицираниот јазик, ние како лингвисти сметаме дека првиот кодификатор на македонскиот јазик е Крсте Петков Мисирков. Слушнавме дека македонскиот јазик потекнува пред векови. А со првиот кодификатор, Мисирков, се официјализира. Тоа се потврдува со неговата единствена книга ‚’За македонцките работи’. Тој потекнува од Ениџе, Вардарско, и, знаете, кога се пишува и се зборува на роден говор, во Прилеп тоа многу добро го знаат, тогаш е најлесно да се изразиш на својот мајчин говор. Но, еден таков научен деец сметал дека научната, и воопшто, целата јавност, кога станува збор за јавен настап, треба да биде на еден кодифициран јазик. Па и тука е големината на книгата. Напишана е на тој, кодифициран јазик што го предлага Крсте Мисирков. Негирањето на македонскиот јазик очигледно е политичко прашање. Досега се објавиле голем број научни трудови. И ние не треба да докажуваме. Со самото тоа што со години работиме на сите јазични нивоа, со тоа е остварена најголемата потврда. Од друга страна, Блаже Конески се повикува на трите принципи што ги поставил Крсте Мисирков. А тоа го прави и целата фела по ослободувањето. Со заеднички сили ја завршуваат, условно кажано, кодификацијата на македонскиот современ јазик, чии основи ги поставил Мисирков“, вели Тантуровска за МИА.

Б. НЕСТОРОСКА