Министерката за култура Ирена Стефоска денска ја разреши Магдалена Ризова-Черних како в. д. директорка на Театар Комедија, како што соопшти Министерството за култура, „поради работа која не е во согласност со закон и статут и во други случаи предвидени со закон“. Министерството вели дека Ризова-Черних и покрај укажувањето нe направила усогласување на Статутот на установа, согласно Меѓународната фраскатиева класификација.
Актерката Магдалена Ризова-Черних на 26 ноември лани беше избрана за в. д. директорка на Театар Комедија, а драматургот Дарко Јан Спасов за уметнички раководител, откако вработените во Театарот се договорија со Стефоска. Тогаш Министерството објави и Јавен оглас за нов директор со полн мандат од 4 години.
На 24 ноември, Стефоска ја разреши претходната в. д. директорка Нора Шаќири-Марковиќ, по што вработените протестираа па со министерката се договорија до изборот на нов директор, в. д. да е Ризова-Черних, а уметнички раководител да е Спасов.
