Грчката министерка за култура Лина Мендони ја критикуваше новата серија на „Нетфликс“ за Александар Македонски, опишувајќи ја како „фикција со крајно слаб квалитет и ниска содржина преполна со историски невистини“.
Серијата „Александар: Создавањето на бог“ ја прикажува романтичната врска помеѓу Александар и неговиот соработник и пријател Хефестион. Во колумна во весникот „Елефтеротипија“ се вели дека серијата ја извртува вистината и се обвинува филмот на Оливер Стоун „Александар“ за почнување пропагандна кампања за неговата хомосексуалност.
Димитрис Натсиу, претседателот на десничарската партија Ники, ја опиша серијата како жална, неприфатлива и неисториска и додаде дека ја шири идејата дека хомосексуалноста била прифатлива во античко време, што нема основа.
Запрашана за серијата во парламентот, Мендони одговори:
„Серијата е полна со историски невистини. Во изворите не се споменува дека врската помеѓу Александар и Хефестион ги надминувала границите на пријателството, како што е дефинирано од Аристотел. Концептот на љубов во антиката е широк и повеќедимензионален. Не можеме да ги толкуваме практиките и лицата кои дејствувале пред 2.300 години по наши мерки, норми и претпоставки. На Александар Велики никогаш не му била потребна интервенција од некој несакан заштитник на неговата историска меморија или, уште повеќе, на неговите личност и морална положба“, изјави Мендони.
Таа додаде дека Грција нема да покрене мерки против „Нетфликс“ зашто тоа би било противуставно. Грчкиот устав ја штити слободата на уметничко изразување од почетокот на 19. век.
Долго време се шпекулира за природата на односот помеѓу Александар и неговиот генерал, а она што никој не го спори е дека тие биле блиски пријатели од детството.
