Една недела пред почетокот на светски познатиот Сиднејски маратон, организаторите се соочуваат со прашања поради дизајнот на медалите за учесниците на кои е изгравиран погрешен градски стадион.
На медалот е прикажан објект кој наликува на „Алијанц арената“ во германскиот град Минхен, наместо стадионот „Алијанц“ во Сиднеј покрај кој всушност поминува маратонската патека долга 42,2 километра.
На настанот закажан за 30 август ќе учествуваат околу 40.000 тркачи, избрани од над 120.000 пријавени кандидати.
Шпекулациите за можната грешка започнаа откако на официјалните профили на социјалните мрежи на Сиднејскиот маратон беше претставен дизајнот за 2026 година. Во објавата се повикуваа корисниците внимателно да ги погледнат деталите кои ја раскажуваат приказната за патеката. Беше објаснето дека дизајнот ги вклучува знаменитостите на градот кои тркачите ќе ги видат по пат, почнувајќи од мостот во Сиднеј до познатата опера.
Разликата помеѓу двата спортски објекти е очигледна во нивниот изглед. „Алијанц арената“ во Минхен е специфична по нејзините илјадници дијамантски воздушни перничиња, додека истоимениот стадион во Сиднеј има порамна фасада со долги бронзени перки.
Втората страна на медалот содржи златно-индиго шара креирана од уметникот Емброуз Килијан. Дизајнот вклучува 42 полукружни ознаки по кружниот раб кои го претставуваат секој изминат километар од трката.
