ДЕЛЕГАТИТЕ НА ВМРОВСКИОТ КОНГРЕС СОБРАЛЕ 1.300 ДЕНАРИ ПОМОШ ЗА УАПСЕНИТЕ ЗА 27 АПРИЛ

    ДЕЛЕГАТИТЕ НА ВМРОВСКИОТ КОНГРЕС СОБРАЛЕ 1.300 ДЕНАРИ ПОМОШ ЗА УАПСЕНИТЕ ЗА 27 АПРИЛПрвиот ден кутијата беше поставена десно од влезот, а вториот ден беше преместена од левата страна веднаш до влезната врата. Првиот ден собрале 1.100 денари, а вториот ден уште 200 денари. (Фото: М. Златевска)

    Делегатите на вонредниот конгрес на ВМРО-ДПМНЕ во Валандово собрале 1.300 денари во кутијата за помош на, како што ги нарекуваат, „неправедно притворените уставобранители од 27 април 2017 година“. Според делегати присутни на конгресот, кои се согласија да зборуваат под услов да останат анонимни, донирале четворица, од кои еден оставил илјадарка, а другите тројца по стотка.

    Кутијата за донации беше поставена пред влезот на Домот на култура „25 мај“ во Валандово, но над 400 делегати, колку што присуствуваа на конгресот на 22 и 23 декември, само ја одминуваа, без да стават пари. Првиот ден кутијата беше поставена десно од влезот, а вториот ден беше преместена од левата страна веднаш до влезната врата. Првиот ден собрале 1.100 денари, а вториот ден уште 200 денари.

    На секој од осомничените од солидарната акција на Конгресот му следува по 36 денари. – Кутијата по завршување на Конгресот (Фото: М. Златевска)

    Партиски извори за САКАМДАКАЖАМ.МК велат дека кутијата била симболично поставена и не била изрекламирана меѓу делегатите, затоа што поважна била Резолуцијата за осуда на сите политички прогони на Специјалното јавно обвинителство и на Основното јавно обвинителство, изгласана на конгресот во Валандово.

    Резолуцијата ја прочита Дијана Трнталовска, една од основачите на ВМРО-ДПМНЕ, која претходно беше потпишана на иницијативата за одложување на конгресот поднесена од видни партиски функционери, но се премисли и учествуваше на конгресот.

    „Тоа е груба злоупотреба и притисок врз судството и врз судските постапки на СДСМ, која се базира на омраза, реваншизам а не врз правна основа. Партиските органи да направат ревизија на сите постапки на неоснованиот политички прогон и ако утврди дека нема одговорност, да се казнат чинителите за неоснованиот прогон“, стои во резолуцијата.

    На конгресот во Валандово беше констатирана оставката на долгогодишниот лидер на ВМРО-ДПМНЕ Никола Груевски, а за нов лидер беше избран Христијан Мицкоски, кој беше единствен кандидат.

    Осомничени за терористичко загрозување на уставниот поредок и безбедноста се 36 лица кои учествуваа во организираниот напад на Собранието на 27 април. На секој од осомничените од солидарната акција на Конгресот му следува по 36 денари.

    Г. ТРПЕНОСКИ

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари