Лидерот на СДСМ Зоран Заев кажа дека 15 јули е последната отстапка која ја прават и изборите ќе се одржат на тој датум, за што добил согласност и од лидерот на ВМРО-ДПМНЕ Христијан Мицкоски. Заев денеска на прес-конференција го повика Мицкоски јавно да каже дека се согласува со овој датум, што тие двајца денеска во телефонски разговор го договориле.

„Мораме да си ги спасиме државата и народот од каков било ризик од дополнително влошување на ситуацијата. Поголема криза од оваа, државата нема да може да издржи без Собрание и Влада. Знам дека преку глава им е на граѓаните од фамозниот датум за избори. Јас и СДСМ преземаме чекор веднаш да заврши оваа игра на нерви. За да не страда народот го заклучуваме 15 јули како конечен и последен датум на кој гарантирано ќе учествува опоцијата“, рече Заев на прес-конференцијата во партијата.

Тој кажа дека ќе се побара претседателот Стево Пендаровски да прогласи нова вонредна состојба, бидејќи се пролонгира датумот за избори. Среда ќе биде прогласен за неработен ден и ќе се гласа до 21 часот. Понеделник 13 јули и втроник 14 јули ќе гласаат болните, изнемоштените, лицата во самоизолација и заразените со КОВИД-19 кои се лекуваат во болница и дома.

„Бараа средина на јули, еве им средина на јули. Праќам порака до Мицкоски, одговорноста пред сопствениот народ е големо дело. Никој политичар не смее да помисли да си игра со сопствениот народ. Доволни беа лошите изненадувања што ВМРО-ДПМНЕ им ги приредуваше на македонските граѓани. Време е да погледнат надвор, да се одважат и ова решение да го потврдат пред народот.Ова е за спас на државата. ВМРО-ДПМНЕ и Мицкоски се повикани да одговорат и да влезат во демократскиот процес заедно со сите други политички чинители во земјава“, кажа Заев.

А. АНТЕВСКА