Сите денешни дојави за бомби се лажни, соопштија од Министерството за внатрешни работи. Попладнево тимовите за антитерористички проверки ги завршија проверките во сите објекти во Скопје и Битола и утврдено е дека станува збор за лажни пријави.

Серија дојави за бомби и добија низа институции и јавни објекти меѓу кои и Меѓународниот аеродром Скопје, кој кратко време беше затворен за авио сообраќај. Дојави стигнаа на електронските адреси на десет училишта во Скопје и пет во Битола, како и во Фудбалската федерација на Македонија, хотел „Александар Палас“, хотел „Мериот“, трговскиот центар „Ист гејт“, спортска сала „Борис Трајковски“.

Дојавата за поставена бомба го затвори хотелот „Александар Палас“ каде требаше да говори премиерот Димитар Ковачевски и министрите за економија и за финансии Крешник Бектеши и Фатмир Бесими на конференција во организација на Стопанска комора на Северна Македонија.