Министерството за здравство соопшти дека 2 јануари 2019 година ќе биде работен ден за вработените во јавните здравствени установи во Република Македонија, иако Владата прогласи неработен ден за државната и јавната администрација и им препорача на приватните компании исто така да не работат.

„Граѓаните кои имаат закажано термини за прегледи на овој ден во специјалистичко-консултативни амбуланти, кабинети за снимања и други дијагностички процедури, како и закажаните хируршки интервенции нема да бидат одложени и ќе бидат извршени согласно закажаните термини“, велат од Министерството за здравство.

По одлуката на Владата на последната седница да го прогласи 2 јануари за неработен ден за јавната администрација, иако законски тој ден не е празник, вработените во приватните компании реагираа дали и како ќе работат градинките, односно дали ќе има каде да ги остават децата.

Министерството за труд и социјална политика излезе со соопштение дека ќе има дежурни градинки, односно дека ги информирало градинките да ја организираат работата и во еден од објектите да овозможат згрижување на децата и за тоа навреме да ги известат родителите.

Е. БОЧВАРОСКА