Вработените во Македонска пошта денеска излегоа на двочасовен протест поради, како што рекоа, тешката финансиска состојба на акционерското друштво. Вработените уште немаат земено плата за февруари, иако законскиот рок е таа да се исплати до 15 во месецот. Велат дека ваквата состојба е поради превработеноста  во администрацијата и на шефовски позиции.

„Со минимална плата на 80 отсто од вработените месецот не се издржува, а особено кога доцни платата. Но, револтот е поголем поради финансиската криза, во која се наоѓаме поради лошото менаџирање и непродуктивни вработувања. Се доведовме во состојба на недостаток на работници во технолошкиот процес како поштари и шалтерски работници, а имаме преполни места во администрацијата и на шефовски позиции. На еден вработен имаме еден шеф“, рече претседателот на синдикатот на Македонска пошта Боро Велигденов.

Во Македонска пошта има 1.800 вработени и 200 лица со договор на дело кои се поштари и со години работат без здравствено осигурување и со минимална плата.

Синдикатот неколку пати алармирал до Владата за состојбата во која се наоѓаат, но велат немаат слух за нивните барања.

Синдикатот бара реформирање на Македонска пошта, а ако не се исполнат барањата ќе почнат постапка за штрајк.

А. АНТЕВСКА