ОКОЛУ 15.000 МАКЕДОНЦИ СЕ ВАКЦИНИРАНИ ВО СРБИЈА, ЗА РЕВАКЦИНА МОЖЕМЕ ДА ВИ ЈА ДАДЕМЕ ТАА КОЛИЧИНА, РЕЧЕ МИНИСТЕРОТ ЛОНЧАР ПО СРЕДБАТА СО ФИЛИПЧЕ

    ОКОЛУ 15.000 МАКЕДОНЦИ СЕ ВАКЦИНИРАНИ ВО СРБИЈА, ЗА РЕВАКЦИНА МОЖЕМЕ ДА ВИ ЈА ДАДЕМЕ ТАА КОЛИЧИНА, РЕЧЕ МИНИСТЕРОТ ЛОНЧАР ПО СРЕДБАТА СО ФИЛИПЧЕОд масовната вакцинација на македонски државјани минатиот месец на Белградскиот саем.(Фото: СДК.МК)

    Околу 15.000 македонски државјани се вакцинирани во Србија, кажа денеска српскиот министер за здравство Златибор Лончар по средбата со министерот Венко Филипче во Белград.  За нивната ревакцинација Лончар кажа дека ќе се направи договор со македонското Министерство за здравство и можно е тие да ја добијат втората доза во земјава.

    Македонските граѓани во Србија во најголем број се вакцинирани во „АстраЗенека“ која во Македонија не се дава на лица под 60 години. На новинарско прашање каде овие лица ќе се ревакцинираат со оглед на одлуката на македонските здравствени власти, Лончар кажа дека можноста тоа да се направи во Србија е најмалку што можат да направат.

    „На граѓаните кои што примија прва доза од вакцина против ковид-19 во Србија она што најмалку можеме да направиме е да им обезбедиме ревакцинација тука. Тоа е наш принцип, но секогаш може да се договориме, бидејќи имаме евиденција на тие граѓани. Ако се договориме и на тој начин е полесно, тие дози може да ги отстапиме на Северна Македонија и таму да се организира вакцинирањето. Тоа дополнително ќе го договориме, има уште 12  недели до ревакцинација“, рече Лончар.

    Министерот Филипче денеска во Белград имаше средба со институтот „Торлак“ каде се произведува руската „спутник“, и било договорено тој да биде стратешки партнер на земјава за набавка на вакцини за наредниот период.

    „Ние за оваа година го имаме обезбедено и нарачано потребно количество  вакцини. Но, со оглед на тоа што многу е веројатно дека оваа вакцина ќе стане сезонска, во иднина институтот ‘Торлак’ ќе биде првото место каде што ќе се обратиме за набавка на вакцини“, кажа Филипче.

    Филипче кажа дека во знак на благодарност до Србија за донацијата на вакцини, Владата ќе донесе одлука сите српски државјани да бидат ослободени од плаќање патарина од 15 јуни до 15 август.

    А. АНТЕВСКА

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира