ПРИТВОР ЗА ДВЕ ЛИЦА КОИ СО БЕНЗИН ГО ПОЛЕАЛЕ И ЗАПАЛИЛЕ АВТОМОБИЛОТ НА ЕКСГРАДОНАЧАЛНИКОТ ШИЛЕГОВ

    ПРИТВОР ЗА ДВЕ ЛИЦА КОИ СО БЕНЗИН ГО ПОЛЕАЛЕ И ЗАПАЛИЛЕ АВТОМОБИЛОТ НА ЕКСГРАДОНАЧАЛНИКОТ ШИЛЕГОВАвтомобилот беше запален на 9 март пред семејната куќа на Шилегов. (Фото: СДК.МК)

    Притвор во траење од 30 дена е одреден за две лица кои намерно со бензин го полеале, а потоа и запалиле автомобилот на ексградоначалникот на Скопје Петре Шилегов. Автомобилот беше запален на 9 март пред семејната куќа на Шилегов, а Основното јавно обвинителство Скопје донесе Наредба за спроведување истражна постапка против две лица, на возраст од 24 и 22 години, за кои постои основано сомнение дека сториле кривично дело – Тешки дела против општата сигурност од член 292 став 1 во врска со член 288 став 1 и во врска со член 22 од Кривичниот законик.

    Со кривичната пријава за истиот настан беше опфатено уште едно лице за кое надлежниот јавен обвинител донесе решение за отфрлање на пријавата, бидејќи за него не се утврдени елементи на кривично дело кое се гони по службена должност.

    „Двајцата осомничени соизвршители, на 9 март, со пожар предизвикале значителна опасност за животот или телото на луѓето. Првиот осомничен повикал такси возило во Ѓорче Петров и влегол на совозачкото седиште, носејќи со себе пластична туба со жолта течност. На таксистот му кажал да вози до улицата Козле, каде во возилото се качил вториот осомничен. По пат двајцата се договарале за начинот на кој ќе го извршат кривичното дело. Од такси возилото се симнале на булеварот Партизански одреди и продолжиле да се движат пеш. Кога пристигнале на улицата Мексичка, двајцата осомничени со течноста полеале паркиран автомобил Ауди Q5 и го запалиле. Пламенот се проширил, па освен автомобилот Ауди, целосно изгорел и автомобил Фолксваген пасат, додека делумно биле зафатени и оштетени уште два други автомобили и еден објект. Со тоа осомничените предизвикале поголема имотна штета“, се вели во соопштението на Обвинителството.

    Надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор за двајцата осомничени, бидејќи постојат околности кои упатуваат дека би можеле да се дадат во бегство, да влијаат врз сведоците или да го повторат делото. Судијата го прифати предлогот и на осомничените им определи притвор во траење од по 30 дена.​

    ​А. АНТЕВСКА

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира