Собранието нема термин за законските измени со кои треба да им се овозможи побрза промена на позитивната листа на лекови кои се на товар на Фондот за здравствено осигурување. Ова е предвидено со измените и дополнувањата на Законот за здравствено осигурување.

Според јавно објавените податоци на Собранието измените и дополнувањата на Законот за здравствено осигурување, кои се почнати во јули годинава, во прво читање во собраниска процедура минале на крајот на август. Во второ читање овие измени не се поминати, а според календарот за работа на Собранието не е закажана седница на Комисијата за здравство на која ќе се расправа за овие законски измени, по што треба да ги дадат на усвојување на пленарна седница на Парламентот.

Членови на собраниската Комисија за здравство велат дека засега нема закажано седница, но велат дека треба да има до крајот на месецот.

Овие законски измени се неопходни за да се ревидира позитивната листа на лекови, кои се на товар на ФЗОМ, односно од неа да се извадат застарените терапии и да се воведат нови, како на болничката листа на лекови, така и на листата на лекови кои пациентите ги подигаат од аптека.

Со предлог измените на Законот за здравствено осигурување треба да се укинат 14 комисии составени од 17 члена и на нивно место да се формира една комисија од 9 члена, која ќе ја ревидира листата. Потребата од оваа измена Министерството ја образложи со тоа дека ова законско решение се покажало како гломазно и нефункционално.

Сегашната методологија за промена на позитивната листа, беше воведена во 2012 година, со која беше укината комисијата која беше под надлежност на Фондот за здравствено осигурување и беа воведени 14 комисии, со 17 членови кои ги формира Министерството за здравство. Од самиот старт имаше проблем со работата на комисиите. По носење на ова законско решение скоро цела година комисиите не беа формирани, а по истекот на мандатот од една година, поминаа скоро година и пол додека да се формираат нови.

Последните десетина години листата не е обновена, а потребата од нејзино менување се потврди и деновиве кога почина пациент од ретката болест пулмонална хипертензија, кој не ја добил потребната терапија. Болеста кај него секундарно се развила како резултат на кардиолошките здравствени проблеми, поради што не можел да влезе во регистарот на пациенти со ретки болести кои терапијата ја примаат преку програмата на Министерството за здравство.

Според здруженијата на пациенти со ретки болести има многу други пациенти, кај кои оваа ретка болест се јавува како втора дијагноза.

„За идиопатска пулмонална хипертензија преку програмата за ретки болести има лекови, но како секундарна дијагноза не можат да добијат. Колку има пациенти со секундарна дијагноза уште не знаеме. Ако лековите се на болничка листа на лекови тогаш сите на кои им се потребни ќе може да ги добиваат, без оглед дали болеста е примарна или е секундарна“, вели Весна Алексовска од здружението за поддршка на лица со ретки болести „Живот со предизвици“.

Ваква најава дека за сите пациенти со пулмонална хипертензија, кај кои болеста е секундарно дијагностицирана ќе се обезбеди терапија со промена на позитивната листа на лекови, вчера даде и министерот за здравство Венко Филипче, кој кажа дека законските измени се во процедура.

Е. БОЧВАРОСКА