СПАСОВСКИ ГО ПОКАЖА МЕРЦЕДЕСОТ ОД 600 ИЛЈАДИ ЕВРА

    СПАСОВСКИ ГО ПОКАЖА МЕРЦЕДЕСОТ ОД 600 ИЛЈАДИ ЕВРАПремиерот Зоран Заев кажа дека дел од каросеријата е изгребана од мачки. - На хаубата на мерцедесот се гледаат отпечатоци од мачки (Фото: СДК.МК)

    Министерот за внатрешни работи Оливер Спасовски го покажа мерцедесот набавен од неговата претходничка Гордана Јанкулоска во 2012 година за речиси 600.000 евра.

    „Како министер во техничката влада ветив дека ќе го покажеме она на „м“. Денеска сакам да покажеме на целата македонска јавност и како се однесуваат со имотот на сите даночни обврзници. Најмногу што боли е што полицајците немаа униформи, ни возила да ги извршуваат задачите, а ова министерство имаше храброст да купи возило од 600 илјади евра“, изјави Спасовски на прес-конференцијата за мерцедесот.

    Луксузно опремениот мерцедес од 600 илјади евра е запуштен, оставен во гаража, дел од каросеријата е изгребана од мачки, рече премиерот Зоран Заев на дебатата на МТВ на 6 јуни.
    Прашан што ќе прави со мерцедесот, Заев рече дека тој ќе се користи за странски делегации, нема да го користи ниту тој ниту министрите.

    КОЛЕКЦИОНЕРСКИ МЕРЦЕДЕС

    „Ако го продаваме, тој чини 585 илјади евра. Можеме да го продадеме околу 400 илјади. Многу губиме. Затоа одлучивме тој да се користи за потребите на меѓународни делегации. Се надевам дека наскоро министерот за внатрешни работи Оливер Спасовски ќе ги повика новинарите и ќе им покаже во каква состојба се наоѓа скапиот мерцедес“, рече премиерот Заев.

    Мерцедесот што за потребите на Владата ги купило Министерството за внатрешни работи беше откриен од прислушуваните разговори во неколку муабети што ги правеле тогашната министерка Гордана Јанкулоска со тогашниот премиер Никола Груевски и со тогашниот директор на Управата за безбедност и контраразузнавање (УБК) Сашо Мијалков.

    Специјалното јавно обвинителство има покренато истрага за набавката на мерцедесот за кој има сомнежи дека бил нарачан според желбите на тогашниот премиер Никола Груевски. На 24 јануари, СЈО соопшти дека ја отворило истражната постапка „Тенк“, во која осомничени се две лица, кои се товарат за злоупотреба на службената положба и овластување во периодот од февруари до октомври 2012 година, а „за да ја исполнат желбата на тогашниот премиер“ за набавка на „специјално возило“.

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира