Германските фудбалски фанови ја испочитуваа молбата на клубовите да не се собираат пред стадионите откако Бундеслигата денеска стана прво големо фудбалско првенство на светот кое продолжи да се игра среде пандемијата на коронавирусот.

Освен што играчите се вратија на терен, сѐ друго беше различно.

Фудбалската сезона ќе се доигра без навивачи (Фото: АП)

Денешните натпревари од првата и втората Бундеслига се играа пред празни трибини, играчите влегуваа во дуели, но не се ракуваа и гушкаа и измислуваа креативни начини на прослава на головите, почитувајќи го главното правило – да се држат на дистанца. На клупата за резерви, играчите седеа со заштитна маска и оддалечени едни од други.

На најинтересниот натпревар по двомесечната пауза, Борусија Дортмунд го прегази Шалке во таканареченото рурско дерби со 4:0.

На клупата за резерви мора да се носи маска (Фото: АП)