Кристијано Роналдо ретко го експонира своето семејство во јавност, но на доделувањето на Златната топка во Париз беше придружуван од дел од најблиските.

Меѓу нив беше и малку познатиот брат на Кристијано, десет години постариот Хуго Авеиро, кој имаше сосема поинаков, дури и проблематичен живот.

Хуго долго време се бореше со зависност од алкохол и дроги, сѐ додека Кристијано не се ангажираше да му помогне. Ѕвездата на Реал Мадрид потроши многу пари за да му обезбеди лекување во најдобрите светски клиники и тоа вроди со плод.

Хуго денес е чист и го води музејот на Роналдо во Мадеира.

„Да не беше Кристијано, мислам дека денес немаше да го има ни Хуго. Тој му помогна не само со пари, туку и со голема волја“, вели нивната мајка Долорес.

Зависностите отсекогаш биле голем проблем во семејството на Кристијано Роналдо. Неговиот татко Жозе Диниш починал од алкохолизам кога Кристијано имаше само 20 години и тоа е главната причина што тој не пие денес или најмногу чаша вино или шампањско.

„Тоа многу го погоди и му го обележа животот. Тој се зарече дека никогаш нема да биде како татко му, со кој, инаку, беше доста близок. Тој ќе беше многу горд на Кристијано да го види денес“, вели Долорес.